Oilasko eta barrengorri quichea

Prestaketa: 1 ordu

Anoa kopurua: 4

Egilea:
egibide-mendizorrotza-logoa-bakarrik
Categories: , Tags: ,

Description

Gastronomian, quiche esaten zaie Frantziako Lorraine quiche izenekotik eratorritako tarta gaziei. Prestatzeko, arrautza irabiatuak eta esne-gain likidoa erabiltzen dira, ebakitako barazkiekin edo haragi-produktuekin (hirugiharra edo urdaiazpikoa takotan moztua) nahastuta; gero, nahasketa horrekin hostorez edo ore hautsiz estalitako molde bat betetzen da. Labean egiten da, masa guztiz egosita egon arte. Masa betetzeko nahasketa egiteko askotariko elikagaiak erabil daitezkeenez (askotan, soberakinak izaten dira), hamaika errezeta aurki daitezke, haragiarekin, barazkiekin (porruak, zainzuriak, alkatxofak, barrengorriak, perretxikoak, boletus…) eta askotariko gaztekin (tradizioz, urgarri eta krematsuak izaten dira, emmental, gruyere, gouda edo cheddar erakoak, besteak beste, baina Idiazabal gazta ere erabil daiteke, guk egingo dugun eran).

Aukera ugari eskaintzen dituen plater hau egokia da edozein bazkari, piknik edo afaritarako; izan ere, nahiko azkar prestatzen da eta ezin hobea da entsalada batez lagunduta. Ore kurruskariak eta betegarri leun eta krematsuak konbinazio ezin hobea egiten dute, eta hainbat eta hainbat osagairekin presta daiteke.

Hauek dira bertsiorik tradizionalenak:

  • Quiche alsaziarra:
  • Quiche mediterraneoa: sukaldaritza mediterraneoak berezko dituen barazkiekin, hala nola tomatea (probentzal izenekoa), piperra eta kuiatxoa.
  • Quiche florentiarra:
  • Beste bertsio batzuek haragia kentzen dute eta, horren ordez, arraina erabiltzen, hala nola izokin ketua eta baita kontserbako atuna ere.
  • Quiche errezeta batzuetan itsaskiak ere erabiltzen dira; nagusiki, ganbak.

Osagaiak

Quichearen oinarria egiteko orea 
200-225 g Hostore ebakin
Quichea betetzeko oinarrizko nahastea
100 g Esne-gain likido
100 g Esne
125 g Arrautza. (2,5 unit.)
b/b Gatza, piperbeltza, intxaur muskatua
   
Quichearen betegarria
5 g Berakatza
200 g Tipula
300 g Barrengorriak (ebakinak eta buruen oinarriak)
100 g Azelga (aurrez egosiak)
350 g Oilasko batetik soberan geratu diren zatiak
5 unit. Arrautza
250 ml Esne
50 g Idiazabal gazta

g: gramo; unit.: unitate; b/b: behar beste; ml: mililitro

Prestaketa

Quichearen oinarria egiteko orea
– Elkartu ebakinak, ORATU GABE.

– Luzatu arrabol batekin eta tolestu behin.

– Estali plastikoz eta utzi hozkailuan 30 minutuz. Luzatu fin-fin (± 5 mm) eta estali moldea.

– Egosi zuritan 200 ⁰C-tan, estalita eta pisua jarrita, 15 minutuz.

Quichea betetzeko oinarrizko nahastea
– Nahastu osagai guztiak hagaxka batekin, eta gorde.

– Garrantzitsua da betegarrian oreka aurkitzea. Arrautzak, esne-gaina eta esnea ondo irabiatu baditugu, nahasketa hanpatuago geldituko da eta botatzen ditugun zatiek bertan flotatuko dute, ondo banatuta; horrek esan nahi du ez direla hondora eroriko.

Quichearen betegarria
– Ebaki berakatza eta tipula brunoise eran, barrengorriak xaflatan, azelgak juliana eran eta oilaskoa 0,5 cm inguruko dadotan.

– Zartagin batean, gorritu gatz-pipertutako oilaskoa eta gorde erretilu batean.

– Zartagin horretan bertan, gorritu zertxobait berakatza oliotan; kolorea hartu baino lehen, gehitu tipula eta sueztitu elkarrekin.

– Gehitu barrengorriak eta igo suaren indarra, ertainera. Ia eginak daudenean, gehitu azelgak eta oilaskoa, eta zuzendu gatza, beharrezkoa izanez gero.

– Gorde tuper batean, momentuz.

Quichearen muntaia

– Oinarria egosita dagoenean, bota zartaginean prestatutako nahasketa gainean, uniformeki banatuta.

– Ondoren, estali lehenago prestatutako “Quichea betetzeko oinarrizko nahastearekin” (zati bat bete gabe gera dadila, gainezka egin ez dezan).

– Jarraian, bota gazta birrindua eta egin labean, 180 ºC-tan, gogortu eta zertxobait gorritu arte.

Aurkezpena

– Apaintzeko, salteatu laurdenetan ebakitako barrengorriak eta gari-zainzuriak. Banatu uniformeki.